سری نگر ہوائی اڈے پر کارگو آپریشنز شروع

سری نگر//سری نگر بین الاقوامی ہوائی اڈے پر زائد از 14 کروڑ روپیوں کی لاگت سے تعمیرہونے والے نئے ڈومیسٹک کارگو کمپلیکس سے منگل کے روز کارگو آپریشنز شروع کئے گئے۔ائیر پورٹ کے ڈائریکٹر کلدیپ سنگھ نے کہا کہ یہ مسافروں اور دیگر متعلقین کے لئے بہتر سے بہتر خدمات فراہم کرنے کی ہماری کوششوں کی ایک کڑی ہے۔انہوں نے کہا کہ اس نئے کمپلیکس میں کولڈ سٹوریج، حساس و خطرناک سامان رکھنے کا بھی انتظام ہے۔ان کا کہنا تھا: ’ہم نے کارگو کی سکریننگ کے لئے دو ایکسرے مشینیں بھی رکھی ہیں اور کارگو کے تحفظ کو یقینی بنانے کے لئے پورے کمپلیکس میں سی سی ٹی وی کیمرے نصب کئے گئے ہیں‘۔موصوف ڈائریکٹر نے کہا کہ ہمارا اپنا عملہ کمپلیکس کے انتظام و انصرام کی نگرانی کرے گا۔انہوں نے کہا کہ سری نگر ہوائی اڈے کے کیچمنٹ علاقے کے کارگو بر آمد کنند گان اور در آمد کنندگان کو بہتر خدمات و سہولیات میسر رکھی گئی ہیں۔ان کا مزید کہنا تھا کہ اس نئے کمپلیکس کو زائد از چودہ کروڑ روپیوں کی لاگت سے تیار کیا گیا ہے۔