سری نگر// بارڈر سیکورٹی فورسز نے ٹنگڈار سیکٹر میں تین مریضوں کو ہسپتال پہنچایا۔بی ایس ایف کے ایک ترجمان نے بتایا کہ کپواڑہ کے دور اُفتادہ علاقے ٹنگڈار میں بھاری برف باری کے سبب تین مریضوں کو اتوار کے روز ائر لفٹ کیا گیا ہے۔ترجمان کے مطابق ٹنگڈار کے دور اُفتادہ علاقے میں تین مریض جن کی شناخت نصرینہ فاطمہ ساکن ہازی نار، صوبیہ بیگم ساکن ٹنگڈار اور رضوان احمد ساکن گومل شامل ہیں اچانک بیمار پڑ گئے۔اُن کے مطابق اطلاع ملتے ہی بارڈر سیکورٹی فورسز نے تینوں مریضوں کو ہیلی کاپٹر کے ذریعے ہسپتال پہنچا یا جس وجہ سے اُن کی جان بچ پائی۔دریں اثنا آئی جی بی ایس ایف راجا بابو سنگھ کا کہنا ہے کہ جموں وکشمیر کے لوگوں کو سہولیات بہم پہنچانے کی خاطر بارڈ رسیکورٹی فورسز کے اہلکار پیش پیش ہیں۔انہوں نے کہا کہ فوج ایک طرف سرحدوں کی حفاظت کے لئے دن رات اپنے فرائض خوش اسلوبی کے ساتھ انجام دے رہی ہیں تو دوسری جانب لوگوں کو سخت موسمی صورتحال کے دوران سہولیات فراہم کرنا بھی ترجیحات میں شامل ہیں۔
