سب ضلع ترال میں جنگلی ریچھ کوزندہ پکڑ لیا گیا

سری نگر// سب ضلع ترال کے مڈورا علاقے میں ہفتے کے روز ایک جنگلی ریچھ کو زندہ پکڑ لیا گیا ہے ۔وائلڈ لائف انچارج کنٹرول روم نذیر احمد خان نے بتایا کہ ’مڈورا ترال میں ریچھ کی نقل وحرکت کی اطلاع موصول ہونے کے بعد متعلقہ محکمے نے ایک پنجرہ نصب کیا تھا‘۔انہوں نے کہا کہ ہفتے کے روز ریچھ کو زندہ پکڑ لیا گیا اور اس کو وائلڈ لائف سنچری منتقل کیا گیا ہے۔مذکورہ آفیسر نے بتایا کہ ترال میں گزشتہ کئی دنوں سے 9ریچھ زندہ پکڑے گئے ہیں ۔بتادیں کہ گزشتہ دنوں ہی بٹہ نور علاقے میں ایک بھاری برکم ریچھ نے کمسن بچی کو زخمی کیا تھا۔قابل ذکر ہے کہ وادی کشمیر میں جنگلی جانوروں کا آبادی والے علاقوں میں گھومنا پھرنا ایک معمول سا بن گیا ہے۔وادی کے کئی علاقوں میں جنگلی جانوروں خاص کر آدم خور تیندوں نے لوگوں کو جانی و مالی نقصان سے دوچار بھی کردیا۔لوگوں کا کہنا ہے کہ جنگلی جانور اب بالائی علاقوں تک ہی محدود نہیں رہ گئے ہیں بلکہ میدانی علاقوں میں بھی نمودار ہونے لگے ہیں جس سے وادی میں خوف وہراس پھیل گیا ہے۔ماہرین کا کہنا ہے کہ جنگلوں کی کٹائی اور وہاں مناسب خوراک اور پناہ کی عدم دستیابی جنگلی جانوروں کے بستیوں کی طرف رخ کرنے کی بنیادی وجہ ہے۔