سری نگر//ضلع ترقیاتی کونسل سری نگر کے چیئرپرسن آفتاب ملک نے سابق وزیر محمد اشرف میر کے ہمراہ آج یہاں لیفٹیننٹ گورنر کے مشیر فاروق خان سے ملاقات کی اورمشیر کو کئی مسائل گوش گذار کئے۔انہوں نے مختلف علاقوں کے عوامی اہمیت کے مختلف مطالبات اُٹھائے اور اس سلسلے میں مشیر کی مداخلت طلب کی۔مطالبات میں آنگن واڑی مراکز کی الاٹمنٹ اور بعض علاقوں میں نئے کھیل میدانوں کی تعمیر کرنا شامل ہے ۔ اُنہوں نے کہا کہ نوجوانوں کو کھیلوں اور دیگر بامقصد سرگرمیوں میں شامل کرنے کیلئے اتھواجن ، شالیمار ، نیو تھیڈ جیسے علاقوں میں نئے کھیل میدانوں کی شمولیت ناگزیر ہے ۔ انہوں نے کھنموہ کے عوام کیلئے ٹرانسفارمر کی تنصیب اور دیگر مسائل بھی گوش گزارکئے۔اس کے علاوہ انہوں نے فقیر گُجری کے مسائل بھی اٹھائے جو بنیادی طور پر ایس ٹی آبادی پر مشتمل ہے ۔ مطالبات میں برانڈ کنی میں پرائمری سکول ، ایس ٹی خواتین کیلئے سلائی مشین سینٹر ، فقیر گجری کے ایس ٹی طلبہ کیلئے موبائیل سکول شامل ہیں ۔ مشیرموصوف نے ان کی طرف سے پیش کردہ مسائل کو بغور سنا اور یقین دِلایا کہ ان کو جلد نمٹانے کے لئے متعلقہ محکموں کے ساتھ اُٹھایا جائے گا۔