راجوری//سیکرٹری قبائلی اَمور محکمہ ڈاکٹر شاہد اِقبال چودھری نے آج ضلع راجوری میں ضلع اِنتظامیہ او رسیکٹول محکموں کے ساتھ مل کر قبائلی تعلیم کے مختلف منصوبوں او رنئے اِقدامات کا جائزہ لیا۔اُنہوں نے ہوسٹلوں میں طلباء سے بھی بات چیت کی تاکہ سہولیات اور نئے بنیادی ڈھانچے کے بارے میں ان کی رائے حاصل کی جاسکے۔ضلع ترقیاتی کمشنر راجوری وِکاس کنڈل نے قبائلی طلباء کی تعلیم سے متعلق مختلف پروجیکٹوں کی پیش رفت کے بارے میں تبادلہ خیال کیا۔ اُنہوں نے بتایا کہ قبائلی علاقوں میں 20سمارٹ سکول تکمیل کے قریب ہیں اور دو نئے ماڈل رہائشی سکولوں کے لئے زمین کی تجویز دی گئی ہے ۔ ضلعی اِنتظامیہ نے تعلیمی سیشن دوم اِی ایم آر ایس شروع کرنے کا عمل بھی مکمل کیا ہے۔ڈائریکٹر قبائلی امور محکمہ مشیر احمد مرزا نے نئے بنیادی ڈھانچے کی تعمیر پر پیش رفت کے بارے میں بتایا جس میں اکلاویہ ماڈل رہائشی سکول ، ہوسٹل اور سمارٹ کلاس روموں کے علاوہ طلباء کو سکالر شپ کی تقسیم کی صورتحال بھی شامل ہیں۔ڈپٹی ڈائریکٹر ٹرائبل ریسرچ اِنسٹی چیوٹ ڈاکٹرعبد الخبیر نے سمارٹ کلاس روموں کے قیام کے بارے میں تفصیلی پرزنٹیشن دی۔ ڈسٹرکٹ ٹرائبل ویلفیئر آفیسر وکیل احمد نے ٹرانسپورٹ کی سہولیات فراہم کرنے کے حالیہ اقدام کے بارے میں بتایا۔ڈاکٹر شاہد اِقبال چودھری نے قبائلی طلباء کے لئے مختلف تعلیمی اِقدامات کی ترجیحات بیان کیں۔ اُنہوں نے کہا کہ حکومت نے تمام اضلاع میں ریکارڈ تعداد میں ہوسٹل قائم کرنے کا مصوبہ بنایا ہے اور رواں برس میں ضلع راجوری میں 125 طلباء کی گنجائش والے 4ہوسٹل شروع کئے جائیں گے ۔ اِی ایم آر ایس کنڈی میں کام شروع کرنے اور اِی ایم آر ایس گرودھن بالا کی تکمیل کے لئے اِضافی رقم مختص کرنے کے علاوہ بلاکس خواس او رڈونگی میں دو نئے اکلاویہ ماڈل رہائشی سکول قائم کرنے کی بھی منظور ی دی گئی ہے ۔اُنہوں نے دو ہوسٹلوں میں جدید بنیادی ڈھانچہ بھی طلباء کے لئے وقف کیا ۔ اُنہوں نے کہا کہ محکمہ نے جدید سہولیات فراہم کرنے کے ساتھ ساتھ تمام ہوسٹلوں میں سمارٹ کلاس روموں کے قیام کا عمل شروع کیا ہے ۔ضلع میں چار نئے ہوسٹلوں کا قیام جس میں 500طلباء کی مجموعی داخلے کی گنجائش ہے ۔ جس کا کام رواں مالی برس میں شروع کیا جارہا ہے ۔توقع ہے کہ اِضافی سہولیات اور انٹیک پیدا کرنے کے علاوہ قبائلی طلباکے لئے معیاری تعلیم میں بہت اِضافہ ہوگا۔ڈاکٹر شاہد اقبال چودھری نے کہا کہ زیر اِلتوأ ہوسٹل کے منصوبوں کے لئے بھی اِضافی فنڈنگ کی منظوری دی گئی ہے جوکہ مطلوبہ اِنتظامی منظوری او رباقاعدہ سکیموں کے تحت فنڈنگ کے ذرائع کی کمی کی وجہ سے ترک کئے گئے تھے جس سے زائد اَز 300 طلباء کی رہائش کے لئے مستفید ہوں گے جن میں ضلع صدر مقامات میں اِضافی بلاک ہوسٹل ، کالاکوٹ میں ہوسٹل اور کوترنکا میں ہوسٹل شامل ہیں۔متعدد وفود سیکرٹری سے ملاقی ہوئے اور قبائلی طلباء کی تعلیم سے متعلقہ مختلف مطالبات پر تبادلہ خیال کیا او راَپنی تجاویز دیں۔متعدد وفود نے سیکرٹری سے بھی ملاقات کی اور قبائلی طلباء کی تعلیم سے متعلق مختلف مطالبات پر تبادلہ خیال کیا اور اپنی تجاویز سے آگاہ کیا۔