سرینگر//ڈویژنل کمشنر کشمیر پی کے پولے نے شمالی کشمیر ضلع کپوارہ کے سرحدی علاقوں کا دورہ کرکے وہاں جاری ترقیاتی منصوبوں کی پیش رفت کا جائزہ لینے کے علاوہ منتخب عوامی نمائندوں سے بھی ملاقات کی۔صوبائی کمشنر کشمیر پی کے پولے نے ضلع کپوارہ کے سرحدی علاقوں – مچھل، کرناہ – کا دورہ کیا۔دورے کے دوران صوبائی کمشنر نے سرحدی علاقوں میں جاری ترقیاتی منصوبوں کی پیش رفت کا جائزہ لینے کے علاوہ پی آئی آئی ممبران سے بھی ملاقات کی۔سرحدی علاقہ کرناہ، ٹنگڈار میں پی آر آئی ممبران نے سرحدی علاقوں میں عوام کو درپیش مسائل سے صوبائی کمشنرکو آگاہ کیا۔پی آر آئی ممبران نے سادھنا ٹنل کی تعمیر شروع کرنے کا مطالبہ کرنے کے علاوہ بجلی، پانی اور سڑک جیسی بنیادی ضروریات کے فقدان کے حوالے سے صوبائی کمشنر کو آگاہ کیا۔ڈی ڈی سی ممبران نے کدھامہ جبدی میں ماہر امراض خواتین ڈاکٹر کی تعیناتی، گبرا علاقے میں بینک برانچ کا قیام، فائر ٹینڈر عملہ کی تعیناتی سمیت دیگر مطالبات کے حوالے سے ایک تحریری یادداشت بھی پیش کی۔ڈویژنل کمشنر نے موقع پر ہی افسران کو عوامی مطالبات کو بروقت حل کرنے کی ہدایات دیں۔سادھنا ٹنل کی تعمیر کے مطالبے کا ذکر کرتے ہوئے ڈویژنل کمشنرنے کہا کہ’’ٹنل مرکزی حکومت کی تجویز کے مطابق تعمیر کی جائے گی تاہم اس سے قبل کپوارہ – ٹنگڈار سڑک کی تعمیر حکومت کی اولین ترجیحات میں شامل ہے۔‘‘
