لفٹینٹ گورنر نے سنت ہرے رام داس پبلک اسکول منڈل کی سالانہ تقریب میں شرکت کی

جموں //لفٹینٹ گورنر منوج سنہا نے آج منڈل میں سنت ہرے رام داس پبلک اسکول کے سالانہ دن کی تقریب میں شرکت کی ۔ اس موقع پر لفٹینٹ گورنر نے شری ہرے رام داس جی مہاراج کی تحریر کردہ کتاب ’’ ہمالیہ ناردیا انترنگ بہرنگ یوگ سادھنا ‘‘ کا اجراء کیا ۔ لفٹینٹ گورنر نے متوازن تعلیم کو فروغ دینے پر زور دیا جو سائینس ، صنعت 4.0 ٹیکنالوجیز سکھاتی ہے اور قدر پر مبنی علم بھی فراہم کرتی ہے ۔ انہوں نے کہا کہ طالب علموں کیلئے کامیابی زیادہ نمبر حاصل کرنے کی دوڑ نہیں ہونی چاہئیے بلکہ زندگی میں قدروں کی وافر دولت حاصل کرنے کیلئے ہونی چاہئیے ۔ انہوں نے کہا کہ سائینسی اور تکنیکی علم کے علاوہ ہمیں قدر پر مبنی تعلیم پر بھی توجہ دینی چاہئیے ، انفرادی ترقی کیلئے ماحول بنانا چاہئیے ۔ لفٹینٹ گورنر نے کہا کہ ہم ڈیجٹل دور میں رہ رہے ہیں جہاں ہم ای لرننگ کے ذریعے کچھ بھی سیکھ سکتے ہیں اس کے ساتھ ساتھ قدر پر مبنی علمی نظام کے ذریعے نوجوان ذہنوں کی تشکیل کیلئے طلباء اور اساتذہ کے درمیان توازن برقرار رکھنے کی ضرورت ہے ۔ لفٹینٹ گورنر نے سیکھنے کو زندگی بھر کا عمل قرار دیتے ہوئے طلباء کے ساتھ ساتھ تدریسی برادری کی حوصلہ افزائی کرنے کی ضرورت پر زور دیا کہ وہ علم کی پیاس رکھیں اور روشن مستقبل کی رہنمائی کریں ۔ انہوں نے مزید کہا کہ ہمارے تعلیمی ماحولیاتی نظام میں مسلسل اصلاح کیلئے کوششیں کی جا رہی ہیں ۔ نئی تعلیمی پالیسی مسلسل سیکھنے اور اختراع کیلئے ساز گار ماحول کو فروغ دینے پر توجہ مرکوز کرتی ہے ، نوجوانوں کیلئے مسلسل بدلتی ہوئی دُنیا کے چیلنجوں سے نمٹنے کیلئے ایک مضبوط بنیاد ڈالتی ہے ۔ لفٹینٹ گورنر نے نوجوانوں سے کہا کہ وہ پنڈت مدن موہن مالویہ جیسے عظیم وژن کے نظریات پر عمل کریں اور ملک کی ترقی اور سماج کی تشکیل نو میں اپنا حصہ ڈالیں ۔ لفٹینٹ گورنر نے طلباء ، فیکلٹی ممبران اور اسکول انتظامیہ کو بسنت پنچمی کے مبارک موقع پر اپنا سالانہ دن منانے پر مبارکباد دی ۔ انہوں نے منڈل اور ملحقہ دیہات کے بچوں کو بہتر تعلیم فراہم کرنے کی کوششوں پر اسکول سے وابستہ لوگوں کی تعریف کی اور اسکول کے قیام میں مقامی لوگوں کے تعاون کی بھی تعریف کی ۔ شری ہرے رام داس جی مہاراج نے اس موقع پر خطاب کرتے ہوئے لفٹینٹ گورنر کی زیر قیادت یو ٹی حکومت سے جموں و کشمیر میں مزید خوشحالی اور ترقی لانے کی امید ظاہر کی ۔ لفٹینٹ گورنر نے اس دن کے موقع پر اسکول کے احاطے میں ’ مولسری ‘ کا پودا بھی لگایا ۔ قبل ازیں لفٹینٹ گورنر نے منڈل کے شو مندر میں پوجا کی اور بسنت پنچمی کے موقع پر خصوصی پوجن کیا ۔ سالانہ دن کی تقریب کا آغاز روائتی چراغ روشن کے ساتھ ہوا جس کے بعد طلباء کی طرف سے سرسوتی وندنا اور اسکول کے فیکلٹی ممبران کی طرف سے بھجن پیش کئے گئے ۔ اسکول کے ٹرسٹی دیو راج کھجوریہ نے اسکول کے کام کاج اور سماج کے پسماندہ طبقے سے تعلق رکھنے والے بچوں کو دی جانے والی مدد کے بارے میں تفصیلی بریفنگ دی ۔ اجے شرما پرچاریہ سنت ہرے رام داس اسکول نے شکریہ کا ووٹ پیش کیا ۔ اس موقع پر ڈپٹی کمشنر جموں انشول گرگ ، سابق قانون سازوں ، پی آر آئی کے نمائندے ، مذہبی رہنما ، طلباء اور ان کے والدین اور تمام شعبہ ہائے زندگی سے تعلق رکھنے والے افراد موجود تھے ۔