جموں وکشمیر کو مناسب وقت پر سٹیٹ ہڈ کا درجہ بحال کیا جائیگا/ڈاکٹر جتندر سنگھ

جموں// وزیر اعظم کے دفتر میں تعینات وزیر مملکت ڈاکٹر جتندر سنگھ کا کہنا ہے کہ جموں وکشمیر کو مناسب وقت پر سٹیٹ ہڈ کا درجہ واپس ملے گا۔انہوں نے کہا کہ وزیر اعظم نریندر مودی اور وزیر داخلہ امیت شاہ پر ہمیں پورا بھروسہ رکھنا چاہئے۔ان باتوں کا اظہار انہوں نے کٹھوعہ میں گوڈ گورننس پروگرام میں شرکت کے بعد نامہ نگاروں سے بات چیت کے دوران کیا۔مرکزی وزیر مملکت نے بتایا کہ وزیر اعظم نریندر مودی اور وزیر داخلہ امیت شاہ نے متعدد بار واضح کیا ہے کہ جموں وکشمیر کو مناسب وقت پر سٹیٹ ہڈ کا درجہ بحال کیا جائے گا۔انہوں نے کہا کہ جب ماحول پوری طرح سے سازگار ہوگا تو ریاست کا درجہ دوبارہ بحال ہوگا۔انہوں نے مزید بتایا کہ جموں وکشمیر کے لوگوں کو وزیر اعظم نریندر مودی پر بھروسہ رکھنا چاہئے ۔اُن کے مطابق جموں وکشمیر میں تعمیر وترقی کا جال بچھانے کی خاطر مرکزی حکومت زمینی سطح پر کام کر رہی ہیں۔مرکزی وزیر مملکت جتندر سنگھ نے بتایا کہ جموں وکشمیر کے حالات معمول پر آرہے ہیں اور لوگ بھی آزاد فضاؤں میں سانس لے رہے ہیں۔انہوں نے بتایا کہ لوگوں کے ساتھ جتنے بھی وعدئے کئے گئے ہیں اُنہیں ہر حال میں پورا کیا جائے گا۔موصوف کے مطابق ہم جو کہتے ہیں وہ کرتے بھی ہیں لہذا لوگوں کو ہم پر بھروسہ رکھنا چاہئے۔انہوں نے کہا کہ موجودہ مرکزی حکومت نے جموں وکشمیر میں قیام امن کی خاطر زمینی سطح پر کام کیا جس کے اب ثمر آور نتائج برآمد ہو رہے ہیں۔