شوپیاں کے چوگام علاقے میں فورسز اور جنگجوؤں کے درمیان تصادم ،دو جنگجو جان بحق

سری نگر// جنوبی کشمیر کے ضلع شوپیاں کے چوگام علاقے میں سیکورٹی فورسز اور جنگجوؤں کے درمیان تصادم میں لشکر طیبہ سے وابستہ دو جنگجو ہلاک ہوئے ہیں۔ایک پولیس ترجمان نے بتایا کہ شوپیان کے چوگام علاقے میں ہفتے کی علی الصبح چھڑنے والے تصادم میں لشکر طیبہ نامی جنگجو تنظیم سے وابستہ دو جنگجو مارے گئے۔مہلوک جنگجوؤں کی شناخت سجاد احمد چک ساکن براری پورہ شوپیان اور راجا باسط بٹ ساکن اچھن پلوامہ کے بطور کی گئی ہے۔قبل ازیں ذرائع نے بتایا کہ جنگجوؤں کے چھپنے کی اطلاع موصول ہونے پر سیکورٹی فورسز نے شوپیاں کے چوگام علاقے کو ہفتے کی علی الصبح محاصرے میں لے کر تلاشی آپریشن شروع کر دیا۔انہوں نے بتایا کہ تلاشی آپریشن کے دوران جوں ہی سیکورٹی فورسز کی ایک ٹیم مشتبہ مقام کے نزدیک پہنچی تو وہاں چھپے جنگجوؤں نے ان پر فائرنگ شروع کر دی جس کے نتیجے میں طرفین کے درمیان تصادم چھڑ گیا۔