لفٹینٹ گورنر نے راج بھون سے تریکوٹہ نگر تک اولیکٹرا گرین ٹیک کی الیکٹرک بس میں سواری کی

جموں//انفو//لفٹینٹ گورنر منوج سنہا نے آج راج بھون سے تریکوٹہ نگر تک اولیکٹرا گرین ٹیک کی الیکٹرک بس میں سواری کی ، جو جموں و کشمیر میں انٹر سٹی اور انٹر سٹی ٹرانسپورٹ سہولیات کو بڑھانے کیلئے آزمائشی طور پر چل رہی ہے ۔ اے جی ایم سیلز اینڈ مارکیٹنگ اولیکٹرا گرین ٹیک لمٹیڈ مسٹر ارون کمار نے لفٹینٹ گورنر کو سواری کے دوران بس کے کام کاج ، خصوصیات اور تکنیکی پہلوؤں کے بارے میں آگاہ کیا ۔ انہوں نے لفٹینٹ گورنر کو آگاہ کیا کہ یہ ایک سات میٹر اولیکٹرا کے 6 الیکٹرک بس ہے جس میں 24 پلس ڈرائیور کے بیٹھنے کی گنجائش ہے اور 80 فیصد چارج کی حثیت کے ساتھ سنگل چارج رینج 160 کلو میٹر ہے ۔ دیگر خصوصیات کے بارے میں بریفنگ دیتے ہوئے اے جی ایم نے لفٹینٹ گورنر کو بتایا کہ بس میں جی پی ایس ، پبلک اناؤنسمنٹ سسٹم ، ائیر کنڈیشنر ، اسمارٹ ٹکٹنگ ، فی سیٹ USB2 پورٹس ، ایمر جنسی اسٹاپ وغیرہ بہت سی دیگر جدید خصوصیات ہیں ۔ بس کی کارکردگی کے بارے میں دریافت کرتے ہوئے لفٹینٹ گورنر نے کمپنی کے نمائندوں کو مشورہ دیا کہ وہ سفر کے دوران مسافروں کی سہولت کیلئے مناسب سامان رکھنے کی جگہ رکھیں ۔ لفٹینٹ گورنر نے کہا کہ جموں و کشمیر حکومت یو ٹی میں عوام کو ٹرانسپورٹ کی معیاری سہولیات فراہم کرنے کیلئے پر عزم ہے اور کہا کہ پبلک ٹرانسپورٹ سسٹم میں بے مثال اضافہ سے ریونیو میں بھی اضافہ ہو گا کیونکہ اپریشنل نقل و حمل کے نیٹ ورک میں زیادہ سے زیادہ قابل عمل اور منافع بخش راستوں کو شامل کیا جائے گا ۔ الیکٹرک بس اپنے تکنیکی ، میکنیکل استحکام اور دیگر عملی پہلوؤں تک رسائی کیلئے مختلف شہروں اور اندرون شہر راستوں پر چلائی جائے گی ۔ قابل ذکر بات یہ ہے کہ اولیکٹرا گرین ٹیک لمٹیڈ کے چئیر مین کے ساتھ میٹنگ کے دوران لفٹینٹ گورنر نے ان سے آزمائشی بنیادوں پر ایک جموں اور ایک سرینگر کیلئے دوالیکٹرک بسیں بھیجنے کو کہا تھا ۔